قصيده من الشاعر / منصور بن طوير
يهديها الى الشاعر زعكان بن عيضه
بعض العرب لو كنت معسور يغنيك
يغنيك الى جاء بالسوالف والامثال
وان جيت بيته قال ربي يحييك
ومد لك من دلة الكيف فنجال
وراعي البخل لو فيه كثرت هقاويك
يخيّب آمالك وتاضيع الآمال
او صيك يازعكان وافهم وابوصيك
خلك لربعك مزبن او ستر وضلال
وخلك كما عيضه بحسب الامل فيك
يعطي ولو كان ان ماعنده اريال
وان جيت متضايق بهرجه يسليك
ويريّضك في البيت لو كنت عجّال
اكرم بني عمك وكرّم مواليك
ولا تسمّع هرجة القيل والقال
خلك مع جارك وظيفك وعانيك
وكثّر الترحيب من طيبة البال
والضيف الى جاء لا محلك وناصيك
خله معك في البيت ساكن وحلال
ولو بغا من خبث نيه يجافيك
الناس ماترضا الاهانه والاهمال
ولو مت ياعيضه نعزك ونغليك
لك في قلوب الناس تقدير واجلال
ماماتوا الاولاد والحي يحييك
رجالهم يسوى ثمانين رجال
{الرد زعكان بن طوير المالكي }
: ياعم والله يشرح الصدر طاريك
والقلب حيا بك من الجال الى الجال
يامكسبي ياراس الأموال والشيك
يابويه الي له في القلب منزال
ايو الله آحبك ورحي تباريك
يشوش راسي منك في كل الأحوال
شرفتنا ياشيخ والكل يوحيك
والدار للضيفان والجار مدهال
ماخاب ضن الي من الضيم يرجيك
وان قلت لك قولاً تبرهنه الأفعال
يالشاعر الي ماقدرنا نجاريك
في صفحة الماضي لك أمثال وأقوال
تروي الشعر من نبض فكرك ويرويك
اسمك ومجدك يا ابيض الوجه لازال
من هيبتك نخضع لحضرت معاليك
يامرجح الميزان بالعدل اذا مال
عينك تراعيني وعيني تراعيك
نبعد مداها عن حسوداً ومحتال
اسمع كلامك والمشوره وحاكيك
واليوم مرسالك برده بمرسال
وصيتك جتني وجتني قوافيك
بيوت فيها سبك وسمان وجزال
ابشر بما يقنعك مني ويرضيك
وان الوعد قدام ياطيب الفال
No comments:
Post a Comment